சனி, 1 ஜூலை, 2017
சாரா ஏன் சிரித்தாய்?
யூலை மாதம் தொடங்குகின்றது, ஏற்கனவே 2017ம் ஆண்டு அரைவாசி முடிந்துவிட்டது. நமது கனவுகள் நிறைவேறினவா? நாம் எடுத்த முடிவுகள் நடைமுறைப்படுத்தப்பட்டனவா? என்று சிந்தித்துக்கொண்டு இருக்கும்போதே 2018ம் ஆண்டு எட்டிப் பார்க்கிறது. இந்த மாதத்தையும், பல கனவுகளோடும் திட்டங்களோடு தொடங்குகின்றோம். யூலியஸ் சீசருக்காக இந்த மாதம் உருவானது, இதற்கு முன்னர் இந்த மாதத்தின் பெயர், குயின்டிலிஸ். இந்த மாதம் அமைதியான மாதமாக ஆசீர்வாதங்களையும், வளங்களையும் கொண்டுவர தொடாந்து உற்சாகத்தோடு உழைப்போம்.
இன்று திருப்பலி நிறைவேற்றியபோது, வாசங்கள் அதிகமாக மனதோடு பேசின. நிழலிலிருந்த ஆபிரகாம் தெரியாத விருந்தாளிகளை நிழலுக்குள் வரவேற்க வெயிலுக்குள் செல்கிறார். வந்தவர்கள் முதலாளிகளாக, முதலாளி ஆபிரகாம் அவர்களின் பணியாளன் ஆகிறார், என்னவொரு விரும்தோம்பல் (தொ.நூல் 18,1-5). யார் வந்திருக்கின்றா என்ற யன்னல் ஓட்டைகள் மற்றம் கதவு ஓட்டைகள், ஏன் கண்காணிப்பு கருவியூடாக பார்க்கும் காலத்தில் ஆபிரகாமின் விருந்தோம்பல் ஆச்சரியத்தை தருகிறது. ஆண்டவர் தோன்றினார் என்ற ஒருமையில் சொல்லி, பின்னர் மூவர் என்று பன்மையில் சொல்லி, மீண்டுமாக ஆபிரகாம் 'தலைவரே' என்று ஒருமையில் அழைக்கிறார். ஆக வந்தவர்கள் மூவரா அல்லது ஒருவரா? வந்தவர்கள் சும்மா உண்ணவில்லை, சாராவிற்கு குழந்தை பாக்கியத்தையும் கொடுகின்றனர். சாரா இயற்கையின் மகள், இதயத்திலிருந்து சிரிக்கிறாள், கடவுள் கேள்வி கேட்க பயத்தால் 'இல்லை' என்கிறாள். மூளை பொய் சொல்ல இதயம் உண்மை சொல்கிறது. சிறிய வயதில், பாடசாலை நாட்களில், வகுப்பறையில் ஆசிரியரின் தவறைக் கண்டு சிரித்துவிட்டு, அவர் முறைக்க சிரிக்காததுபோல் நடித்தது நினைவிற்கு வருகிறது. இன்னும் சிரிப்புத்தான் வருகிது.
மத்தேயு, இயேசுவை குணப்படுத்துகிறவராக காட்டுகிறார். உதவிகேட்கிறவர்கள் யாராகவும் இருக்கலாம். அவர்கள், யூதர் விரும்பாதா உரோமையராக, விரும்பும் தன் நண்பன் பேதுருவின் மாமியாக, தன் சொந்த இன மக்களாகவும் இருக்கலாம், அவர் குணப்படுத்துகிறார். ஆக இவர் சந்தித்து குணப்படுத்தும் ஆண்டவர். யூதர்களாலும் கிறிஸ்தவர்களாலும் வெறுக்கப்பட்ட உரோமையனின் உண்மையான இதய வரி 'ஒரு வார்த்தை சொல்லும் என் பையன் குணமடைவான்' பின்னாட்களில் நம்முடைய நாளாந்த செபமாகிறது. நல்ல முன்னுதாரணம். (மத் 8,5-17).
கதவைத் தட்டும் விருந்தாளியை, எதிர்பார்ப்பில்லாமல் வரவேற்கும், தமிழ் விருந்தோம்பலை வரவேற்க எண்ணுகிறேன்! ஒருவேளை வருகிறவர், ஆண்டவராக, குணப்படுத்துகிறவராக அல்லது சந்திக்காத நண்பராகக்கூட இருக்கலாம். நல்ல நாள் வாழ்த்துக்கள். யூலை வெற்றியளிக்கட்டும்.
ஜெகன்குமார் அமதி
